20190809 Aviso á xente do mar, a navegantes deportivos, a bañistas, a surfeiros e a demais colectivos que estean estes días na costa: malia que estamos en agosto, hai galernas coma se de outono se tratase. Por esta razón, e ante a previsión de que o estado de mar empeore estes días (por mor do vento do suroeste que tamén se deixou notar, moito, onte antonte), a Dirección Xeral de Emerxencias (Vicepresidencia da Xunta) activou a alerta laranxa por temporal costeiro na Coruña e Lugo. O aviso vén dan dado polos temporais que afectarán ao noroeste e oeste da Coruña e a Lugo. Agárdanse ventos do oeste ou suroeste con forza 7 con mar combinada do oeste e ondas de 5 a 6 metros.
Por este motivo, e co fin de garantir a seguridade dos bens e as persoas, a Dirección Xeral de Emerxencias e Interior, a través do Centro de Atención ás Emerxencias 112 Galicia, informou da situación aos concellos da provincias afectadas; deputacións, servizos provinciais e agrupacións de voluntarios de Protección Civil e aos clubs náuticos, entre outros. “Deste xeito, agardamos que se adopten as medidas oportunas para garantir a seguridade dos bens e das persoas”, explica a Dirección Xeral, salientando e subliñando a recomendación de evitar aproximarnos “a diques ou rompentes, co fin de previr un eventual golpe de mar”, e ficar “lonxe da costa, praias, rompentes, paseos marítimos, espigóns, peiraos ou todas aquelas zonas que podan ser varridas polo mar”.
Tamén se aconsella a suspensión das actividades pesqueiras e marisqueiras como medida preventiva naquelas zonas máis perigosas. Ademais, aconséllase consultar a web do CIAE 112 (www.112galicia.org), que conta con información meteorolóxica e con ligazóns de interese.
