20190815 A serie sobre a desaparición e morte de Diana Quer, anunciada hai aproximadamente un ano como a gran aposta televisiva de Telecinco, finalmente non verá a luz. A cancelación da produción, que se deu a coñecer esta mesma semana, pon fin a meses de traballo. A noticia volve poñer de manifesto a necesidade de marcar unha liña vermella entre as temáticas que son susceptíbeis de ser levadas á ficción televisiva e as que non. O rexeitamento da familia da Diana ao proxecto audiovisual dende o seu inicio, pon de manifesto, claramente, que a temática en cuestión debera atoparse no segundo grupo. Segundo se fai saber, foron estas presións dos achegados as que finalmente remataron por facer máis aconsellábel a cancelación.
Neste intre a serie atopábase en proceso de localización de exteriores (no concello de Bueu) e no de procura da totalidade do equipo interpretativo. Xa estaban definidos algúns personaxes e mesmo xa había título: 500 días (o tempo que pasou dende a desaparición até que foi atopada a moza nunha nave de Rianxo). Estímase que os gastos foron de 50.000 euros.
