20190806 O Pazo-Torre de Goiáns será rehabilitado integralmente pola unión temporal de empresas (UTE) Proyecon Reboben González, cuxos traballos de restauración estaban programados para esta mesma semana. A contía dos labores a realizar, que se estenderán a longo do vindeiro ano e medio, será de 990.850 euros. As actuacións abranguen non só a reconstrución do edificio en si mesmo, senón que tamén se estenderán á torre anexa, un dos elementos máis sobranceiros do edificio e, en xeral, de toda a arquitectura civil galega. O proxecto inclúe o mantemento e conservación da feitura orixinal das escaleiras, os muros e a balaustrada.
O financiamento dos traballos foi posíbel grazas a un préstamo sen intereses solicitado polo Concello de Boiro ao Fondo de Cooperación do Instituto Galego da Vivenda e Solo (IGVS), que deberá ser devolvido durante oito anualidades (131.000 euros ao ano).
O Pazo-Torre de Goiáns, recentemente esborrallado, foi incluído, polo seu longo historial de desleixo e ruína, na listaxe vermella de bens ameazados que elabora Hispania Nostra.
Compromiso do actual equipo de Goberno
O novo Goberno local de José Ramón Romero García, Martiño, manifestou recentemente que apostará decididamente pola esperada rehabilitación e posta en valor da torre-pazo, pero cunha serie de novidades moi salientábeis. Para comezar, ten previsto un estudo para declarar tanto o edificio como á súa relevante contorna Ben de Interese Cultural (BIC).
En termos máis concretos, o novo alcalde comunicou a O Barbanza a intención do Concello de “manter a estrutura existente e dar tamén os primeiros pasos para devolver ao xardín o esplendor de antano”, ao que se sumaría unha nova liña de actividade que estaría directamente encamiñada a xerar oportunidades formativas para os colectivos locais: “Vemos moi interesante fomentar os obradoiros de emprego neste espazo”.
Entre as tarefas pendentes, recoñece Martiño, tamén figuraba a de “estudar a remodelación do equipo de Goberno anterior, xa que a modificación das paredes interiores e o tellado non foi acertada”.
