20190809. Onte celebrouse en Boiro un pleno ordinario no que se levaban tan só tres asuntos na orde do día. De feito, tivo unha duración de apenas 15 minutos. Razón pola cal non estivo presente o edil de IC Boiro, Manuel Velo, quen chegou para a sesión cando os seus compañeiros xa saían.
O primeiro dos puntos quedou sen resolver e pendente para a seguinte sesión, xa que os distintos grupos da corporación municipal non recibiran a acta. O segundo, o cal trataba sobre a determinación dos festivos locais para o 2020, quedou aprobado por unanimidade. Así, os elixidos foron a festividade do Carme, o 16 de xullo, e o día de San Ramón, o 31 de agosto.
O terceiro asunto a abordar foi a moción presentada por Boiro Novo relativa ao aumento das políticas de diversidade e inclusión nas festas de verán. O grupo municipal requiriu que os espazos físicos das actividades sexan accesibles; que se habiliten atraccións para tódolos públicos; que haxa contido con diversidade cultural; que se dispoña de horarios das xornadas musicais para todas e todos; que existan espazos ou xornadas horarias libres de ruído; a necesidade da salubridade das festas; que se estableza comunicación accesible dos eventos; e que a diversión estea “ligada a novos valores.” Deste xeito, a concelleira de Cultura, María Outeiral, expuxo que “dende o goberno local imos traballar por levar adiante esta proposta, non so nas festas do verán, senón nos demais festexos que se celebren no municipio.” Finalmente, a proposta foi aprobada con nove votos e sete abstencións correspondentes ao PP.
Na quenda de rogos e preguntas, a voceira do BNG, Raquel Suárez, pediu o uso do galego nos comunicados oficiais do Concello, mentres que a voceira de Boiro Novo, Dores Torrado, inquiriu sobre o desafiuzamento feito semanas atrás a unha familia boirense, así como sobre o estado dunhas obras de traída da auga en Bealo. Pola súa parte, o primeiro tenente de alcalde, José Luis Ruiz, contestou que se reuniu cos afectados, sendo a intención do Concello solucionar esta problemática neste ano, pero que non será posible ata o próximo debido á necesidade dunha inversión de 200.000 euros. Boiro Novo tamén fixo un rogo para aumentar a vixilancia nas inmediacións do CEIP de Escarabote coa finalidade de evitar o “trapicheo” que denuncia a veciñanza do lugar que se esta a producir con frecuencia.
