20190820 O Goberno galego confirmou hoxe que a escola infantil do Polígono da Tomada comezará a funcionar a pleno rendemento o vindeiro curso escolar, o curso 2019-2020. A gardería, que foi impulsada tirando partido das axudas da Xunta para a creación deste tipo de centros en contornas laborais e empresariais (e estendido ás cooperativas agrarias e máis ás confrarías de pescadores), disporá de 41 prazas. O obxectivo: facilitar a conciliación e o día a día das nais e pais que leven a cabo a súa actividade laboral no polígono.
Xunto co da Pobra, tamén se vai poñer en marcha outra escola no Porriño, na área industrial da Granxa. Ademais, abriron as súas portas o curso pasado os centros escolares do polígono Río do Pozo, en Narón, con 61 prazas; e o do polígono de Mos, con 74.
A gardería da Tomada é a primeira das súas características da comarca do Barbanza. A encargada das obras foi a empresa Orinoco e contou cunha subvención de 200.000 euros da Consellería de Política Social, concedida á asociación de empresarios da contorna industrial pobrense para a edificación do inmóbel nun solo total de 2.000 metros cadrados. A asociación achegou os 50.000 euros restantes que foron precisos para completar o orzamento. A escola ten 250 metros cadrados de superficie e conta con tres aulas modulares. Prevese que a ocupación inicial será do 80%.
