20190807. Tal e como anunciáramos a semana pasada, o municipio de Ribeira vai acoller o vindeiro venres, 23 de agosto, a cuarta edición da Andaina Solidaria co Alzhéimer. Hoxe tivo lugar a presentación deste evento na Casa do Concello, onde se manifestou a pretensión de acadar un éxito de participación semellante ao do ano pasado, no que preto de 300 persoas se animaron a involucrarse nesta altruísta iniciativa consolidando a proposta.
A presidenta da asociación AGADEA, Isabel Gey, acompañada da responsable do Centro de Alzhéimer de Ribeira, Noelia Riaño; de Eduardo Iglesias, en representación de Arousa NeO, entidade encargada dos aspectos técnicos; e de Ana Ruiz, concelleira de Servizos Sociais, explicaron os detalles desta actividade de 10 quilómetros de distancia, aínda que caberá a posibilidade de percorrer unicamente un anel de 3 quilómetros pensado en aqueles que non se vexan con forzas para completar o circuíto completo.
Segundo recordou Isabel Gey, a pretensión da andaina reside en visibilizar a problemática do alzhéimer coas necesidades e dificultades que supón. A cita sairá ás 21.00 horas do parque García Bayón e pasará por Coroso, Deán para pasar polo paseo marítimo de Coroso, avenida da Coruña, Deán, petróglifo da Pedra das Cabras, ermida de San Alberte e regresar novamente ao García Bayón. A cita estará amenizada pola agrupación Chorimas de Queiruga.
Dado que se desenvolve entre lusco e fusco hai que levar lanterna ou aparello similar. Ao concluír haberá un avituallamento e, por outra parte, ás 21.30 horas, para os acompañantes e para todos aqueles que o desexen achegarse ata a praza da Concordia, proxectarase a curtametraxe Bicicleta, cuchara, manzana, que reflexa a loita de Pasquall Maragall e a súa familia contra a enfermidade do alzhéimer.
A inscrición nesta andaina, a cal está aberta a calquera idade, supón unha doazón de 5 euros e pódese formalizar na páxina web www.agadea.org e chamando ou enviando un whatsapp ao número 672 705 053.
A edil Ana Ruiz animou a veciños e visitantes a que se apunten nesta solidaria iniciativa na que terán a oportunidade de coñecer ademais algúns dos máis fermosos atractivos do municipio.
