20190801. O venres, 23 de agosto, terá lugar a IV Andaina Solidaria co Alzhéimer de Ribeira, mantendo o lema ‘Os camiños da memoria’. Este evento deportivo enmárcase nas celebracións do 25 aniversario de AGADEA.
Así, o parque García Bayón converterase no punto de saída e chegada de aproximadamente 250 participantes. O formato da andaina contará con dous aneis de distinta lonxitude, buscando adaptarse a tódolos públicos. Deste xeito, o anel curto será de 3 quilómetros percorrendo o parque García Bayón e o paseo das Carolinas ata entrar no paseo marítimo de Coroso. Despois, acompañaranse aos participantes na ruta longa ata Deán Grande e desde aí retornarase pola estrada de acceso ata o cruce coa avenida da Coruña, onda Casa Fontao, entrando novamente no paseo marítimo para retornar ao punto de saída polo paseo das Carolinas. Por outra banda, o anel longo dispón de 10 quilómetros de distancia e desenvolverase polo monte de San Alberte chegando ata a ermida, e un pequeno tramo polo monte de Espinle, baixando pola zona coñecida como A Cañoteira dirección á Carballa, pasando pola Pedra das Cabras. Desde aí, retornarase pola estrada de acceso a Deán Grande ata o cruce coa avenida da Coruña, xunto a Casa Fontao, entrando novamente no paseo marítimo de Coroso para volver ao parque García Bayón polo paseo das Carolinas. Ademais, o avituallamento intermedio situarase á altura da capela de San Alberte e estará amenizada pola agrupación Feitos Polbo.
Para o peche do evento, estará previsto un avituallamento final.
Como novidade, aquelas persoas que agarden polos camiñantes que realizan o anel menor poderán visionar o documental Bicicleta, cuchara, manzana, filme de Carles Bosch baseado na loita contra a enfermidade de Pasqual Maragall e a súa familia. Esta proxección dará comezo a partir das 21.30 horas, cunha duración dunha hora e media.
A proxección e animación correrá a cargo de Musieventos.
A saída, prevista para as 21.00 horas, será amenizada pola Agrupación Folclórica Chorimas de Queiruga, mentres que a chegada será ao redor das 23.30 horas.
Os interesados poden anotarse antes do mércores, 21 de agosto, ou ata completar o límite de prazas establecido en 250 persoas, cunha doazón de 5 euros destinados á loita contra o alzhéimer. As inscricións poden formalizarse de xeito presencial no Centro de Día de Ribeira, no teléfono 672705053 ou na páxina web www.agadea.org dentro da ligazón https://bit.ly/2LtzajU.
Desde a organización recomendan levar iluminación axeitada e anuncian que os participantes recibirán como agasallo unha camiseta conmemorativa do evento. Así mesmo, trasládanlle o seu agradecemento a Arousa NeO pola súa colaboración, ao Concello de Ribeira polo seu apoio e implicación e aos demais colaboradores e patrocinadores que fan posible esta iniciativa.
