20190805. A sección sexta da Audiencia Provincial da Coruña confirmou o auto ditado polo Xulgado de Instrución número 1 de Ribeira no que decretara a posta en liberdade provisional, con medidas cautelares, da condutora implicada no accidente sucedido en Palmeira o pasado 4 de maio no que faleceron dúas persoas. O tribunal completou as medidas adoptadas polo instrutor co requirimento expreso á investigada de que se absteña de conducir vehículos de motor durante a permanencia da medida de intervención do permiso de condución.
A Audiencia considera acreditado o arraigamento persoal da muller, pois reside cos seus fillos, o que “atenúa o risco de fuga” que alegan os recorrentes. En canto á posibilidade de reiteración delituosa, o tribunal lembra que o xuíz instrutor estableceu “unha serie de medidas para tratar de conxurar os riscos derivados desa posta en liberdade”, tales como a prohibición de abandono de territorio español, a entrega do pasaporte, a privación provisional do permiso de conducir e a intervención e depósito do seu vehículo.
Ademais, a Audiencia resalta que “é certo que a investigada pode conducir sen ter o permiso, pero tamén o é que se o fixese, a pesar da prohibición expresa, estaría a poñer de manifesto que a medida adoptada resulta insuficiente e que a alternativa que lle deixaría ao tribunal sería a de acordar a súa prisión, polo que entendemos que dita posibilidade é un elemento disuasorio bastante eficaz.”
