Esta mañá declarou nos xulgados ribeirenses María del Pilar Fernández Patiño, a condutora implicada no accidente mortal rexistrado o 4 de maio no límite entre os municipios de Ribeira e A Pobra do Caramiñal, á altura da parroquia de Palmeira. Un sinistro no cal faleceron a parella formada polo pobrense Abraham Muñiz Santos, de 29 anos, e pola palmeirana Sara Lampón Buceta, de 28 anos; mentres que Pilar resultou ferida de gravidade, polo que foi trasladada ao Hospital Clínico Universitario de Santiago. Alí realizáronlle as probas que deron positivo en alcohol cunha taxa de 1’37 e en substancias psicotrópicas relacionadas con ansiolíticos.
Pilar chegou ao edificio para declarar minutos antes das 12.00 horas acompañada de dous dos seus fillos. Pouco antes, foron interrogadas as catro testemuñas a petición do avogado das familias das vítimas. O xuíz que instrúe o caso decidiu deixala en liberdade provisional con cargos. Tamén lle retirou o permiso de conducir e o pasaporte, intervindo tódolos vehículos que figuren ao seu nome, ademais de obrigala a comparecer no xulgado os días 1 e 15 de cada mes.
A acusación particular, representada por Antonio Arca, solicitara a prisión provisional como medida cautelar e impútalle catro delitos: dous por homicidio, un por condución temeraria e un por conducir baixo os efectos de substancias psicotrópicas e alcohol. O letrado anunciou que apelará a decisión de non admitir a prisión provisional no prazo de cinco días, xa que “a prisión provisional non pretende castigar á persoa, senón evitar que se escape ou reincida.” Así mesmo, manifestou que “opoñémonos e imos apelar o auto porque entendemos que a retirada do carné non evita a reiteración delituosa.”
Pola súa parte, o avogado da defensa, Manuel Méndez, explicou que “a investigada pediulle perdón ás familias e está moi afectada porque ela ten fillos e ponse no seu lugar.” Tamén asegurou que a súa defendida é “unha vítima máis e que desexaría estar morta.”
O caso continúa na súa fase de instrución.
