20190830. A ludoteca, situada no local multiusos da praza de abastos de Boiro, acolleu hoxe, ás 13.30 horas, os dous sorteos presenciais de 100 euros en vales de compra para utilizar nos establecementos colaboradores coa Asociación Boirense de Empresarios (ABE). O acto contou coa presenza do presidente da ABE, Daniel García, e do alcalde José Ramón Romero.
Unha das nenas presentes foi a man inocente encargada de sacar a papeleta campioa do primeiro dos sorteos, o cal tivo en conta as entradas utilizadas na ludoteca. O azar quixo que o número triunfante fose o 14527, correspondente a Lidia Hermo Martís, nai da cativa.
No caso do sorteo entre tódolos clientes que cubriron o reverso dos recibos de compra dos comercios asociados, houbo que sacar ata tres boletos, pois os dous primeiros nomes non estaban no lugar. Finalmente, a gañadora foi Patricia González Vilas.
Ademais, co obxectivo de despedir a ludoteca, celebrouse unha festa con entrada libre, desde as 11.00 ata as 13.30 horas, onde os máis pequenos da casa puideron realizar manualidades, globoflexia e pintura de cara, entre outros.
Daniel García sinalou que ao longo desta iniciativa participaron ao redor de 200 cativos, así como “bastantes persoas” nos sorteos, polo que están “contentos coa repercusión.” De feito, a intención é darlle continuidade o próximo ano e non descartan facer algo semellante durante a tempada de Nadal.
