Ribeira honrará a San Cristovo este domingo

01 Xullo 2019

20190701. Este domingo, 7 de xullo, os condutores festexarán a conmemoración do seu patrón, San Cristovo. Unha festividade que se recuperou hai oito anos grazas ao labor da asociación Alfaia e da Parroquia de Santa Uxía. A xornada en Ribeira comezará ás 11.00 horas con pasarrúas a cargo do grupo de gaitas Xiada, así como unha concentración de vehículos no Malecón. Unha hora máis tarde, ás 12.00, celebrarase a Misa Solemne na Igrexa Parroquial de Santa Uxía, cantada pola Coral Polifónica do Círculo Mercantil e Industrial de Ribeira dirixida por Antonio Fernández Ageitos. Aínda que nesta liturxia lembrarase a tódalas vítimas de accidentes de tráfico, María José Sampedro, concelleira de Cultura, sinalou que “este ano ten un matiz especial porque a Eucaristía vaise dedicar a Sara e Abraham, veciños do municipio que o pasado 4 de maio tiveron un tráxico accidente e faleceron.” Por iso, destacou que “vai ter máis emotividade.” A procesión partirá do recheo portuario, onde tamén se realizará a correspondente bendición, percorrendo as rúas García Bayón, Padín, Lepanto, Miguel Rodríguez Bautista, Alcalde Fernández Bermúdez, Rosalía de Castro e Galicia ata a igrexa. A concelleira de Cultura tamén quixo agradecer a colaboración dos clubs Reventapistóns e Galicia Garage.

Pola súa parte, María José Carreira, vicepresidenta da asociación cultural Alfaia, expresou o seu agrado de poder levar a cabo esta festividade, pois indicou que durante a súa nenez “na miña casa, que nos dedicábamos á compra e venta de peixe e tiñamos camións, era unha celebración moi especial onde nos xuntábamos toda a familia para conmemorar a San Cristovo, que era o noso santo protector.” Así mesmo, indicou que trataron de recuperar este sentimento coa conmemoración do santo buscando a súa protección e convidan a tódolos veciños para que participen cos seus vehículos, incluso cun autobús, “nesa singular procesión que facemos atravesando toda Ribeira con tanto bullicio e alegría.” Tamén quixo desculpar a ausencia na rolda de prensa da presidenta da asociación, Mari Carmen García, quen “é a alma máter desta actividade e de todas as que vén organizando Alfaia.”

Finalmente, Alfonso Mera, párroco de Santa Uxía, manifestou que, desde a Parroquia, apoian todo este tipo de iniciativas. Ademais, puntualizou que “a celebración de San Cristovo toca a moita xente porque somos moitos os que conducimos, os que temos responsabilidades de cara a outras persoas coma as que levamos no coche”, polo que tamén é un día de sensibilización e concienciación, así como ter en conta a tódalas persoas que traballan nas estradas e que “buscan que a seguridade chegue ás nosas conciencias, da necesidade de telo moi en conta.”

Outros artigos

Publicidade

Revista en papel

Opinión

“Reto astrolabio”. Alberto Barciela

“Reto astrolabio”. Alberto Barciela

El mar merece respeto, aun así reclama y admite audacias, quizás motivadas por el horizonte casi infinito. El ser humano, en la búsqueda de sí mismo, de completar inquietudes y afanes, de responder a su curiosidad, acepta con gusto el reto de los nuevos rumbos,...