20190717 A comarca de Barbanza segue a pechar fileiras na loita contra o lume. Este mes de xullo puidemos saber que os traballos de limpeza forestal do sistema autonómico de xestión de biomasa (sistema creado a través do convenio de protección das aldeas asinado entre a Consellería do Medio Rural, SEAGA e a Federación Galega de Municipios e Provincias, a FEGAMP) abranguerán os concellos de Porto do Son (onde se rozarán máis de 315 hectáreas, nas parroquias de Baroña, Caamaño, Ribasieira e Xuño), Boiro, Lousame e Rianxo, todos eles municipios da nosa contorna.
Os traballos a realizar desenvólvense con drons que avalían o terreo e, en base ao seu labor de seguimento, permiten coñecer polo miúdo o estado da vexetación de cada unha das parcelas incluídas nas áreas a intervir. Os vehículos aéreos tamén analizan o estado dos accesos ás contornas en seguimento.
As parroquias que se integren no convenio terán ao alcance da man a posibilidade de ter limpas as súas propiedades dentro das franxas dos 50 metros próximos aos núcleos de poboación “a un prezo máis económico có prezo de mercado pola execución destes traballos, a 35 euros cada mil metros cadrados”.
A día de hoxe xa hai 204 concellos galegos adheridos a este sistema de xestión de biomasa, un número que, segundo advertiu os días pasados Medio Rural, seguirá a medrar en canto se fagan visíbeis as vantaxes que supón o convenio para os municipios e a súa veciñanza.
En virtude deste acordo actuarase para previr incendios en 70 parroquias de 35 concellos da Comunidade no período 2019-2022 mediante a xestión da biomasa nas faixas secundarias.
En termos de superficie, está programado actuar nunhas 4.500 hectáreas este ano, ata chegar a unhas 16.000 ao remate do período. Na provincia da Coruña son 14 as parroquias seleccionadas, pertencentes aos concellos de Carballo, A Coruña e Teo, amais dos municipios barbanzáns de Boiro, Lousame, Rianxo e Porto do Son.
