20190729 O escritor Xosé Duncan (Chorente – Taragoña – Rianxo, 1970) presentou a súa nova novela, Mnemea (Galaxia), na Feira do Libro de Rianxo, que vén de pechar (onte) as súas portas. Duncan, que mostrou a súa ledicia por estar na súa terra dando conta do seu traballo literario (así o reflectiu no seu Twitter, xunto coas restantes andainas pola comarca motivadas e abeiradas á súa estadía en Rianxo), veu acompañado (este sábado 27) pola concelleira de Cultura, Raquel García Abuín.
Na feira púxonos ao tento dos fíos argumentais da súa nova obra: unha novela que xira arredor da figura de Lois Mourinho, antano exitoso escritor de literatura fantástica mergullado, no presente, na elaboración da que será a súa derradeira contribución á literatura, Mnemea.
Mnemea, a segunda obra de Duncan publicada por Galaxia (logo de As lembranzas perdidas no lago Antelväri, de 2018), desta volta na serie Literaria, foi cualificada polo autor como a súa “obra con maior dose de realismo e, á vez, a máis onírica e fantástica”. E engadiu: “Se houbo xente que comparou a miña anterior novela, Antelväri, co universo Lovecraft ou con Stephen King, eu penso que Mnemea é máis do xeito do mestre Poe”.
Sobre o autor
Xosé Duncan (Chorente – Taragoña – Rianxo, 1970) achegouse por vez primeira ao mundo da escrita pola xanela que lle ofreceu o proxecto Contos Estraños. Aí colaborou con numerosos relatos desde 2012 até 2015 e publicou a triloxía de fantasía épica As crónicas de Bran. Tamén se achegou ao xénero de terror coa novela curta Hostal Norte (Urco) e á distopía coa crítica social e política na futurista cidade de Negruña (Urco). Quedou finalista en 2016 na segunda edición do certame de Literatura Fantástica Antón Risco coa obra Os soños da Deusa Nai e do Deus Tolo. Alterna o traballo como informático coa creación de máis literatura fantástica e a coordinación da revista Contos Estraños. En 2018 publicou con Galaxia As lembranzas perdidas no lago Antelväri e en 2019 foi a quenda de Mnemea, tamén con Galaxia.
