20190715. O grupo municipal do BNG boirense denuncia o peche do dispensario médico en Cabo da Cruz durante os meses de verán, así como o recorte en persoal do Centro Sanitario e do PAC de O Saltiño.
Acompañado da deputada nacionalista no Parlamento Galego, Montse Prado, o grupo municipal denunciou estes feitos. Así mesmo, anunciaron que “se levará este problema, xunto ao resto de recortes que teñen lugar no resto do País, ás correspondentes sesións parlamentarias.”
Segundo manifestaron, esta situación ten “o interese de fondo en ir precarizando pouco a pouco a sanidade pública para xustificar os miles de millóns de euros que se desvían tódolos anos á sanidade privada.”
Tamén expresaron que a profesionalidade dos traballadores e traballadoras posibilita unha sanidade pública “moi digna.” Ademais, precisaron que desde a Xunta de Galicia “xa non só reducen partidas orzamentarias, se non que tamén atacan directamente ao persoal sanitario con soldos e contratos precarios e con eliminación de postos de traballo.”
