20190718 Pobra vai celebrar este 21 de xullo a mobilidade limpa e sustentábel. Estamos a falar da Festa da Bici, que organiza a Concellaría de Deportes cunha vertente marcadamente saudábel pero tamén solidaria: cada participante achegará un quilo de alimentos non perecedoiros no intre de formalizar a inscrición, produtos que logo serán recollidos polas asociacións de Cáritas do municipio para, en última instancia, botar unha man ás familias que o precisen. Segundo informa o Concello, será unha festa solidaria pero tamén participativa e aberta: poderán sumarse a ela todos os veciños e residentes. O único que se esixe é o seguinte: traer bicicleta e casco.
O punto de partida será a praza Alcalde Segundo Durán, a partir das 10.15 horas. Alí, o persoal encargado da organización encargarase de realizar a inscrición dos/das participantes. O paseo comenzará aproximadamente ás 11.00 horas, con saída e chegada na praza Maior. Dende ás 10.30h. ata ás 13.30h. haberá un inchable instalado no mesmo lugar de chegada para todos nenos e nenas. Haberá dous circuítos: un percorrido con saída ás 11.00 horas para cativas e cativos de até oito anos (irán acompañados por un adulto e cubrirán unha distancia de 2 km totalmente chaira e polo casco urbano, tamén poderán participar os nenos mais maiores que teñan dificultades para realizar un percorrido mais longo) e un percorrido grande para maiores de oito anos (logo do traxecto dos máis pequenos, terá unha distancia de 11,45 quilómetros e un perfil suave e moderado).
Percorrido grande: Parque do Castelo – r/ Fedz Albor –Pistas Castelo – R/Diaz de Rábago – R/a Paz- San Roque – Camino Ancho – A Tomada – Poligono industrial A tomada – A Mirandela- Campiño – Cerzias – Laxe – A Illa ( descanso) – Laxe – Maño – Silva – Ponte de San Antonio – Paseo do Areal – Praza Maior.
Á chegada de volta a praza Maior farase un sorteo de agasallos cedidos por diferentes entidades comerciais da Pobra: Gadis, Eroski, Centro Sport/Maniotas e Sport Bike. Organiza esta actividade a Concellaría de Deportes da Pobra do Caramiñal e colabora o Motoclub Sin Frenos e as entidades devanditas.
