20190730 Os 1.100 anos da parroquia de Corrubedo, toda unha historia a carón do mar, van seguir sendo este mes de agosto motivo de celebración, logo das actividades de conmemoración e divulgación das que fomos dando conta este mes de xullo en O Barbanza: a conferencia co historiador Francisco Sánchez Fraga e máis a viaxe ás décadas pasadas de Corrubedo que achegou o arquiveiro municipal de Ribeira, José Antonio Otero Sobrido. As actividades da Asociación Corrubedo Once Siglos non rematan aí. Este 25 de agosto está previsto conmemorar os once séculos de vida da parroquia cun xantar veciñal.
A cita será na explanada do porto, baixo unha carpa habilitada para dar acollida aos comensais e na compaña de música, exaltacións histórico-gastronómicas e máis a proxección de pezas audiovisuais que mostren en imaxes a longa historia e o rico patrimonio da localidade mariñeira. A peza estrela será un vídeo elaborado polo devandito investigador Francisco Sánchez Fraga.
