Boiro xa loce as súas bandeiras azuis

20190705. O presidente da Deputación da Coruña, Valentín González Formoso, e o alcalde de Boiro, José Ramón Romero, participaron esta tarde no acto oficial de izado de dúas das sete bandeiras azuis en praias coas que conta este verán o municipio boirense, liderando así a clasificación provincial de areais que contan con este recoñecemento.

Na praia de Carragueiros, xunto aos socorristas contratados polo Concello para garantir a seguridade nas praias de Boiro durante a tempada estival, González Formoso destacou que o elevado número de distincións “converte a Boiro, un ano máis nun referente turístico na provincia da Coruña”, xa que o distintivo recoñece a excelente calidade das augas, a preservación do medio ambiente na contorna e a existencia de servizos e accesibilidade adecuada.

Formoso destacou “o bo traballo” dos dez municipios costeiros coruñeses, entre eles Boiro, que suman un total de 38 bandeiras azuis, máis dun terzo do total de 107 concedidas en Galicia este verán.

Pola súa banda, o alcalde de Boiro, José Ramón Romero, destacou que dous dos areais boirenses reciben a maiores o distintivo Q, que avala a calidade turística dun total de 21 praias en Galicia. Así mesmo, apuntou que “debemos garantir os servizos, ano a ano, e a calidade das praias e outros areais en canto accesibilidade, seguridade, limpeza e calidade das augas.”

Deste xeito, Boiro lucirá este verán un total de nove bandeiras azuis. As distincións correspóndense coas sete praias de Barraña, Carragueiros, Mañóns, A Retorta, Barraña-Saltiño, Ladeira do Chazo e Piñeirón; así como cun sendeiro e un centro social.

Formoso e Martiño izaron tamén a bandeira azul nas inmediacións do Náutico de Cabo de Cruz, onde corenta nenos e nenas participaron esta semana no primeiro curso da Campaña de Vela da Deputación e aprenderon a navegar en augas da ría de Arousa.

O presidente provincial e o alcalde clausuraron o curso e conversaron cos alumnos acerca dos coñecementos adquiridos estes días sobre a práctica do deporte da vela.