20190723. Boiro converterase en epicentro das motos do 26 ao 28 de xullo cun amplo abano de actividades para tódalas idades. A xornada arrancará o venres 26, ás 18.00 horas, coa apertura de inscricións con consumición e pincho de benvida, así como a entrega de obsequios e información turística do concello boirense e da zona Arousa Norte. O prezo da inscrición de venres a domingo é de 35 euros, mentres que da tarde do sábado ao domingo é de 30. Desde a organización encargada deste evento, Boiromotos, indicaron que como novidade deste ano contarán cun concerto en directo a cargo de Caras B e The Karavan, a partir das 23.45 horas.
Así mesmo, o secretario da organización, Manuel García, destacou que “tiramos moito pola canteira, polos nenos, con seguridade viaria infantil, algo ao que a xente non lle da importancia, pero hai que criar aos nenos enfocándoos de cara ao futuro.” Por iso, o sábado 27 terá lugar en dúas quendas, ás 11.30 e ás 17.00 horas, un curso de seguridade viaria destinada aos máis pequenos da casa, con monitores ensinándolles a parte teórica e práctica de como comportarse nas vías, tanto sendo peóns coma pilotando vehículos.
Ademais, Manuel García salientou que no transcurso do sábado, ás 10.30 e 17.00 horas, celebrarase en zona delimitada o adestramento do piloto local de Boiromotos ‘DIEGO 45’, quen se atopa actualmente no Campionato de España de Moto 5.
O domingo 28, ás 11.15 horas, terá lugar a saída da ruta Mototurística que transcorrerá polos concellos de Boiro, A Pobra do Caramiñal, Ribeira, Poro do Son e Noia. Ao remate desta, ao redor das 12.30 horas, haberá consumición gratuíta. Finalmente, a comida para os inscritos nas instalacións acondicionadas para tal fin a cargo de Catering ARELAS, ás 14.00 horas, porá o broche de ouro á fin de semana.
Tamén haberá inchables, exhibicións, xuntanzas e premios, entre outros.
Para máis información poden visitar a páxina web www.boiromotos.com.
