20190718. O alcalde de Boiro, José Ramón Romero; o concelleiro de Deportes, Marcos Fajardo; e membros da directiva do club de Voleibol de Boiro recibiron á Selección Española Feminina de Voleibol no municipio.
O recibimento oficial realizouse no salón de plenos do Concello, onde o alcalde e o concelleiro de Deportes fixeron intercambio de agasallos entre o municipio boirense e o equipo feminino de voleibol. Do mesmo xeito, tódalas participantes asinaron e dedicaron unhas palabras no libro de visitas do Concello, quedando así marcada a súa presencia para a posteridade.
A selección comezou a traballar este pasado luns en Boiro con 17 xogadoras para preparar o Campionato de Europa, no que se clasificaron na pasada tempada. Os partidos desta cita darán comezo o venres 23 de agosto na cidade eslovaca de Bratislav.
Como parte do traballo de preparación, as xogadoras da Selección Española Feminina de Voleibol recibirán este venres, ás 19.30 horas na Cachada, a Hungría para disputar un bilateral amigable.
