20190723. O xoves, 25 de xullo, coincidindo co Día de Galicia e sendo festivo autonómico, realizarase o espectáculo pirotécnico de Boiro, o cal se corresponde cos festexos do verán e que tivera que ser aprazado. Acompañada de música, a tirada de fogos de artificio terá lugar ás 00.00 horas na praia de Barraña, ao final da avenida da Avellaneda. Ademais da pirotecnia, vaise instalar a orquestra Limón na praza da Boqueira A Negral, poñendo así o broche final.
Desde o goberno municipal de Boiro informan que estiveron traballando nas pasadas semanas, xunto coa empresa pirotécnica, mandos da Garda Civil, Portos de Galicia, Subdelegación do goberno e empresa aseguradora, para ter toda a documentación ao día; non só para os fogos de Boiro, senón tamén para os de Cabo de Cruz e Escarabote que segundo os organizadores “foron un éxito.”
Así mesmo, o executivo manifesta que “fomos traballando e solucionado os problemas que atopábamos por data de lanzamento, sen esquecer os que estaban pendentes en Boiro.”
Respecto á administración e corpos de seguridade, tamén agradece a colaboración máxima e bo facer de Portos de Galicia, Garda Civil, especialmente ao departamento de armas, e Subdelegación do Goberno, logo de que “prestasen axuda e estivesen en continua disposición.”
Finalmente, o executivo lembrou que “este foi un traballo entre todos e así debe continuar sendo nos vindeiros anos. Temos que tomar nota e ter todas as cuestións e actividades preparadas con antelación. Evitando a improvisación.”
