20190730 A Deputación da Coruña vén de dar a coñecer a contía que adica a impulsar o mantemento, a mellora e a profesionalización das oficinas de turismo da provincia: un total de 800.000 euros. Segundo explica a entidade provincial, arestora a práctica totalidade dos ditos servizos municipais están operativos grazas a esta convocatoria. En total, a Deputación beneficia con estes apoios as oficinas de 55 concellos, incluídas as catro que teñen presenza en Arousa Norte: a de Rianxo, a de Boiro, a de Pobra e máis a de Ribeira.
Segundo informa a entidade provincial, a devandita contía “supón unha incuestionábel mellora na calidade turística e na imaxe da oferta dos concellos”, ademais dun importante pulo para a creación de emprego de calidade para o sector”, en palabras do vicepresidente e deputado da área de Turismo da Deputación da Coruña, Xosé Regueira.
Neste ano 2019 o orzamento da convocatoria ascende a 800.000 € cun total de 55 concellos beneficiarios da subvención. Os importes de adxudicación varían entre os 20.000 € de importe máximo e os 4.160 € de mínimo, cun baremo que ten en conta o número de prazas de aloxamento, a capacidade de cobertura da demanda turística e o interese turístico e a planificación sostida no tempo. Os concellos, co importe adxudicado, teñen a obriga de ter a oficina aberta como mínimo 4 meses para garantir unha información sostida no tempo.
A Deputación lembra que os enderezos e os horarios das oficinas pódense consultar na ligazón https://turismo.dacoruna.gal na sección “puntos de interese”.
