20190731 As praias da comarca do Barbanza van estar entre os obxectivos primordiais da campaña Non sexas pirata! para este mes de agosto, unha iniciativa impulsada polo Goberno galego para loitar contra o que se vén coñecendo como “furtivismo de bañador”, ou sexa, a extracción ilegal de marisco. A idea é actuar sobre os areais que contan con maior produción marisqueira e, ao mesmo tempo, con maior número de visitantes. En total, até o 31 de agosto actuarase en 45 praias galegas. Inclúense, os vindeiros días, o Castro-Catía e Coroso, en Ribeira; O Areal na Pobra; Barraña e Carragueiros, en Boiro. Tamén se farán accións de sensibilización en Boa Grande, en Noia, e en San Francisco e Parameán, en Muros.
A campaña da que forman parte estas iniciativas de concienciación busca implicar a todas as partes na loita contra a problemática do furtivismo de traxe de baño mediante a posta en valor do labor dos mariscadores e mariscadoras e o chamamento á responsabilidade de cada bañista. A este traballo de concienciación súmase o que desenvolve o Servizo de Gardacostas de Galicia cos corpos e forzas de seguridade do Estado, que cada verán realizan unha media de máis de 500 inspeccións nas praias galegas que se chegan a saldar cunha media de arredor dunha tonelada de marisco comisado.
Segundo explica o Goberno galego, as accións que inclúe a iniciativa consisten nunha dinámica de xogo educativo que pretende amosar o traballo que hai arredor do marisqueo e dos profesionais desta actividade. Nelas explícanse aspectos sobre as especies autóctonas de marisco, a importancia de respectar o traballo dos profesionais do marisqueo e a dureza deste labor. Tamén se expoñen diferentes labores que realizan as mariscadoras e os mariscadores como as sementeiras e a limpeza e cuestións sobre os talles mínimos. A gastronomía, a seguridade alimentaria e a rastrexabilidade tamén se abordan de xeito ameno e práctico nas actividades da campaña.
