20190731 A Biblioteca Municipal de Ribeira conmemorou nesta recta final de xullo a contribución literaria e ensaística dunha das figuras máis relevantes da nosa cultura recente: Xosé Chao Rego. E fíxoo achegando parte da súa extensa obra ás lectoras e lectoras. Títulos (acabados de incorporar aos fondos de Ribeira) tan sobranceiros como por exemplo O libro da auga, O misterio do lume, Eu renazo galego ou O sexo, a muller e o crego.
Segundo
explican dende a biblioteca ribeirense, Chao Rego (Vilalba,1932-
Santiago, 2015) é autor dunha extensa produción ensaística nos
eidos da Teoloxía e a Antropoloxía Social, unha contribución que
tivo históricos fitos como a publicación do primeiro tomo da
Historia do Pobo de Xesús, obra de referencia na esexese
bíblica e cuxo lanzamento está a piques de cumprir corenta anos.
Amais, engádese, “os escritos de Pepe Chao caracterízanse
por unha análise do pensamento universal dende unha óptica
netamente galega”. A biblioteca tamén lembra a “estreita
relación” que Chao Rego tivo co concello de Ribeira, máis polo
miúdo con Aguiño, con cuxo párroco, Francisco Lorenzo Mariño,
tivo unha longa e frutífera amizade.
A Biblioteca Municipal de
Ribeira vén de adquirir para o seu fondo bibliográfico unha boa
parte da súa obra, que convida a ler (parafraseando un dos títulos)
“para comprendermos Galicia”.
