Ribeira vai estar este verán no epicentro da loita contra as actitudes machistas. O motivo? A celebración en xullo dun curso aplicado para a prevención e intervención en violencia de xénero, da man da Universidade de Santiago (USC). A actividade formativa, dirixida polos profesores Ramón Arce Fernández e Gualberto Buela-Casal, celebrarase no Auditorio de Ribeira. O prazo para a inscrición neste curso de verán rematará o 28 de xuño. Abordarase o problema das agresións dende as ópticas das accións institucionais (autonómicas, locais), do contexto xurídico, do psicolóxico e do policial.
En termos máis concretos, falarase de programas e accións da Xunta contra a violencia de xénero, do perfil criminolóxico e psicolóxico do feminicida, de aspectos psicolóxicos entre vítimas e agresores, de primeiros auxilios, do impacto da violencia de xénero sobre a saúde física e mental, da eficacia da reexperimentación emocional nos traumas, da intervención con penados con liberdade, do programa de axuda a fillos que viviron violencia familiar, da publicidade sexista, das consecuencias penais das agresións e das medidas xudiciais de protección á vítima ao abeiro do pacto de Estado contra a devandita lacra social.
O curso conta co co financiamento do Concello de Ribeira, do Grupo LoMonaco, da Asociación Española de Psicología Conductual, do Consello Oficial de Psicoloxía de Galicia, da Unidade de Psicoloxía Xurídica e Forense, spin-off da Universidade de Granada e da Secretaria Xeral da Igualdade, Xunta de Galicia e Deputación da Coruña.