20190624 Os concellos de menos de 50.000 habitantes van contar con novas axudas para rehabilitar e rexenerar o seu patrimonio. Segundo fixo saber a Consellería de Medio Ambiente, porase en xogo un orzamento de 6,4 millóns de euros para financiar, con préstamos sen xuros, os ditos proxectos de recuperación de inmóbeis e espazos urbanos. Ademais, as axudas tamén abranguerán a adquisición de predios degradados para a súa posta en valor. O prazo de presentación de solicitudes para os concellos remata o 1 de outubro. Nas anteriores convocatorias participaron Ribeira (Parque Nacional Illas Atlánticas) e Boiro (Torre-Pazo de Goiáns).
O fondo de cooperación achegado por Medio Ambiente busca facilitar as actuacións subsidiarias de rehabilitación nos casos en que os propietarios das vivendas desatendan as súas obrigas. Nestes casos, informa a consellería, a normativa vixente permite aos consistorios actuar de maneira subsidiaria e logo reclamar aos propietarios o importe das actuacións realizadas, pero “moitos concellos non exercen o seu dereito por non dispoñer do financiamento necesario, ao que agora poderán acceder, con xuro cero, a través deste fondo de cooperación do Instituto Galego de Vivenda e Solo”.
Nas convocatorias de 2017 e 2018 concedéronse préstamos por importe de 3,78 millóns de euros aos concellos de Parada de Sil, O Barco de Valdeorras, Rubiá, Xunqueira de Ambía, Ponteareas, Ribeira e Boiro para a rehabilitación e adquisición de diversas construcións.
Polo que respecta a Ribeira, participa das primeiras axudas á rehabilitación que se conceden para actuacións na primeira área de rehabilitación integral insular, a do Parque Nacional Illas Atlánticas de Galicia (arquipélagos das Cíes, Ons, Sálvora e Cortegada, que aglutinan en total 136 vivendas). No que atinxe a Boiro, o fondo de cooperación ten destinado un orzamento de máis de un millón de euros para facilitar o Pazo de Goiáns, que o Goberno local anterior tiña previsto converter en centro cultural e museo.
