20190618 A Deputación da Coruña e un grupo de concellos da provincia, entre os que se atopan Rianxo, Lousame, Noia, Porto do Son e Pobra do Caramiñal, están a facer fronte común pola defensa das diferentes identidades sexuais e da comunidade LGTBQI+. Trátase dunha iniciativa conxunta para celebrar o Día da Diversidade Sexual, que se conmemora no mundo o 28 de xuño. A campaña coruñesa desenvólvese baixo un lema que quere (e pode) ser viral: Liberdade de ser e sentir!
A través dela, organizaranse unha serie de accións divulgativas para lembrar a importancia (poñendo o foco nas novas xeracións) de sermos tolerantes e integradores, amais de respectuosos coa orientación de cada quen. A campaña comezou este 17 de xuño nas redes, baixo o cancelo #seresentir apostando.
Este ano formarán parte da mesma un total 39 concellos da provincia da Coruña: Ames, Arteixo, Arzúa, A Pobra do Caramiñal, As Somozas, Bergondo, Betanzos, Cambre, Carballo, Cariño, Cedeira, Cerceda, Cerdido, Coirós, Corcubión, Culleredo, Fene, Fisterra, Laxe, Lousame, Moeche, Narón, Noia, Outes, Oza-Cesuras, Paderne, Pontedeume, Porto do Son, Rianxo, Rois, San Sadurniño, Sobrado, Teo, Toques, Tordoia, Trazo, Val do Dubra, Vilarmaior e Vimianzo.
Contémplanse dentro da campaña a posta en marcha de accións dirixidas a xerar na sociedade valores como a tolerancia e a igualdade das persoas gais, lesbianas, bisexuais, transexuais, queer e intersexuais, co fin de naturalizar e sensibilizar á sociedade sobre as diversidades sexuais e visualizar a comunidade LGTBQI+.
