20190620. De cara a constitución da corporación da Deputación Provincial da Coruña, son nove os concellos da comarca adscritos á xunta electoral de Noia, correspondéndolle tres deputados: dous do PP e un do PSOE. Os escanos populares estarán ocupados por Manuel Durán, da Pobra do Caramiñal, e Beatriz Molinos, de Outes; mentres que o socialista correrá a cargo de Sandra González Castro, de Noia.
Pola súa parte, os populares repartiranse en dúas anualidades, entrando catro persoas. No primeiro período do mandato estarán presentes Manuel Durán e Beatriz Molinos, para dar paso no segundo período a José Javier Pego, de Porto do Son, e Teresa Villaverde, de Lousame. Esta última será a única que repita como deputada provincial, pois xa formou parte da anterior corporación.
No caso dos socialistas, estes logran recuperar a un representante da comarca na institución provincial, pois durante os últimos catro anos o cargo correspondeulle á nacionalista Ánxela Franco, quen faleceu recentemente.