20190628. O grupo nacionalista de Boiro presentou hoxe no Rexistro Xeral do Concello un escrito no que defenden unhas festas laicas e populares de acordo á Carta de Principios Políticos, ideolóxicos e valores da formación. Deste xeito, manifestan que non comparten que “cargos políticos electos nun sistema democrático e aconfesional, desfilen xunto a palios, mantillas e outros símbolos relacionados co pasado.” Tampouco comprenden que nas festas do verán, “que son unhas festas non relixiosas”, se inclúan misas na programación festiva. Así, rexeitan que “a igrexa católica, como ente privada, solicite aínda máis privilexios dos que xa ten para que o erario público se faga cargo dos gastos derivados das súas celebracións propias.”
No caso concreto das festas do Sacramento, consideran que hai unha asociación veciñal e sen ánimo de lucro que sustenta a organización do evento, polo que “debera ser a interlocutora ca administración municipal.”
Os nacionalistas fan esta declaración pública “a favor dunhas celebracións que nos representen a todas e a todos e que transmitan valores acordes cas leis que nos rexen, como o laicismo, a igualdade de xénero e a defensa da cultura propia”, así como o seu desexo de que toda a veciñanza do municipio desfrute dos festexos.
