A campaña impulsada pola asociación da nosa comarca Asociación Amicos para sensibilizar e informar á veciñanza do Barbanza sobre o autismo continúa o seu percorrido polos nosos concellos. Faino cunha exposición divulgativa que comezou a súa viaxe o 2 de abril con motivo do Día Mundial da Concienciación sobre o Autismo e que chegou este luns 22 de abril a Rianxo. Coma nas anteriores paradas, na vila organizouse un acto de benvida ao que asistiron o alcalde e a concelleira de Política Social do concello, Julián Bustelo e Ana Vidal, a presidenta de Amicos, Esther Vidal, así como escolares de CEIP ADR Castelao.
Os cativos e cativas do CEEPR de Amicos e algúns dos mozos/as do Centro de Atención Integral da asociación foron, unha vez máis, os encargados de conducir o acto. Este comezou co Pasapalabra do TEA, xogo para o que os e as asistentes foron divididos en dous equipos. Tras un desenvolvemento moi igualado, a dinámica rematou en empate entre os equipos vermello e azul.
Con esta actividade buscase que a cativada se familiarice con novos concepto sobre o autismo. Ao remate do xogo, un dos alumnos do colexio rianxeiro quixo compartir co resto de participantes que os movementos de autorregulación son comúns entre algunhas persoas con autismo.
A continuación, realizouse a presentación da exhibición que estará localizada na praza de Padrón
da vila, moi próxima á estatua da rianxeira. Alí os peques de Oleiros leron o seu manifesto, no que volveron reivindicar que con ou sen autismo, “todos somos iguais e á vez moi especiais”. Alí, tanto
os nenos e nenas de 5º do CEIP ADR Castelao e do CEEPR de Oleiros como o resto de asistentes posaron cunha pancarta conmemorativa para poñer punto e final a unha xornada onde a inclusión e a sensibilización foron os protagonistas.
Durante o acto, a presidenta de Amicos quixo agradecer a compañía dos asistentes, tralo que puxo o foco na importancia da investigación: “É moi importante dar a coñecer que temos o autismo moi preto de nós. Que se continúe a investigar tanto a súa orixe como o que o rodea para que poidamos ofrecer ás persoas que o teñen e ás súas familias a maior calidade de vida posíbel. Dende Amicos continuaremos a ofrecerlle ás persoas con TEA e ao seu círculo todos os apoios que necesiten”.
O encargado de pechar o acto foi o alcalde Julián Bustelo, que comezou salientando “o ben que o fixeron os amicos que conduciron o acto, posto que eu teño que falar en público moitas veces e sei o difícil que é e os nervios que produce”. Asemade, quixo agradecer aos asistentes “por estar hoxe aquí en Rianxo e compartir con nós algo tan importante”. Tamén destacou o papel de Amicos á hora de “dar visibilidade o trastorno TEA tanto para as persoas que o teñen como para as súas familias”, tralo que se dirixiu ás nenas e nenos para destacar que participen neste tipo de accións con vistas a “aprender a ser mellores e deixarnos aprender a nós con vós tamén. Que queirades entender a realidade e as dificultades das persoas con TEA cando esteades con eles no patio, no recreo… e os acompañedes niso”.
Unha viaxe para mostrar a realidade de 1 de cada 100 persoas
Esta campaña informativa naceu coa idea de percorrer distintos puntos do Barbanza para achegarse aos veciños e veciñas de todos os puntos da comarca, co obxectivo de democratizar información sobre o autismo e normalizar este trastorno.
En Rianxo, a praza de Padrón acolle os tótems informativos entre o 22 e o 28 de abril. Noia acollerá a exposición do 28 de abril ao 6 de maio na praza do Concello e Lousame será a última parada no itinerario, onde os monólitos estarán instalados do 6 ao 12 de maio, tamén fronte a Casa Consistorial.
Ata o de agora, xa percorreu os concellos de Ribeira, Porto do Son, A Pobra do Caramiñal e Boiro.
