Este luns 29 de xaneiro celebrouse a entrega de premios da edición do ano 2023 da Ruta de Tapas Barbanza Arousa, o certame +QTapas. O galardón de Ribeira foi dar ao Bar Plaza, rexentado polos irmáns Antonio. O gañador do concello de Rianxo foi O Guadalupe, no concello de Boiro impúxose Pik By Xoanes e no concello da Pobra do Caramiñal, O Galeón.
Segundo informou a Mancomunidade, a ruta é nunha iniciativa anual que se consolida ano tras ano e a través da cal ponse en valor a enogastronomía do territorio, enxalzando tanto os produtos do mar coma os viños da IXP Terras do Barbanza e Iria. “Trátase ademais dun produto desestacionalizador posto que ten unha grande capacidade de atracción da demanda en meses de tempada baixa, como é o mes de novembro”, sinalou a directiva da Mancomunidade.
Este ano, os premios aos participantes da ruta de tapas foron sorteados a través de tarxetas rasca e gaña coas que se podía ser agasallado con tapas noutros locais de balde e viños da IXP Barbanza e Iria do territorio como son Entre os Ríos, Saborido e Cazapitas.
Nesta IX edición da Barbanza Arousa +QTapas participaron 36 establecementos de hostalaría.
Tal e como indicou na entrega de premios Fátima Cachafeiro, xerente da mancomunidade, “chegáronse a vender ao redor de 9.000 tapas o que supón un impacto económico de máis de 40.000€ sumando a venda da tapa máis a consumición que acompaña”
O presidente da entidade e alcalde de Ribeira, Luis Pérez Barral, agradeceu a implicación e a participación e manifestou que “dende a Mancomunidade Barbanza Arousa estamos e estaremos ao lado da hostalería. Entre todos podemos xerar iniciativas e proxectos en colaboración que dean pulo ao noso empresariado e ao noso destino”.
