A Asociación de Empresarios de Ribeira emitiu un novo comunicado sobre a variante (a estrada de circunvalación de Ribeira proxectada polo anterior equipo de Goberno para facilitar o acceso ao centro da cidade e a outros barrios de Santa Uxía dende a autovía e rexeitada polo actual Executivo, que propuxo unha alternativa “menos gravosa para o medio ambiente e os propietarios das fincas implicadas”). No comunicado a patronal amosa a súa preocupación polas obras do proxecto, “tendo en conta a posición da Deputación da Coruña de non ter entre os seus próximos obxectivos o de realizar ningunha actuación de mellora sobre a estrada DP- 7305 que transcorre de Xaras a Aguiño, pasando por Frións e que podería facer de circunvalación de Ribeira”. Este feito, segundo indicou o presidente da asociación, Francisco Martínez Gude, “fai máis necesario que nunca pedir á Xunta de Galicia a axilización das obras da variante de Ribeira xa en execución nun dos seus tramos”. E engade: É ao noso entender totalmente necesario blindar a execución total desta obra, así como axilizar as obras da mesma, máis aínda cando o Goberno local manifestounos que non se opón á devandita actuación”.
Por estes motivos, a patronal solicitou á Consellería de Infraestruturas e Mobilidade que “tome en consideración esta demanda e se é posíbel nos facilite un encontro co departamento para expoñerlle estas e outras cuestións, xa que consideramos que neste momento en que nos atopamos, as tres obras principais que máis interesan ao noso concello, son, sen importar a orde, pois todas son prioritarias, a variante, o polígono e o novo Centro de Saúde, sen esquecernos da Residencia de Maiores e outras necesarias para que Ribeira se posicione ante o futuro e non quede ancorada no seu pasado”.
