“Un Plan de saneamento anual para salvar a produtividade das rías”. Antón Luaces

O patrón maior da confraría de pescadores de Noia, Santiago Cruz, con 22 anos no cargo e 40 de mariscador, reclama á Xunta a posta en marcha dun plan anual de saneamento porque “as rías non soportan máis a contaminación que lles afecta dende vai moito tempo. Dóulle un máximo de dez anos de vida, que son os que os mariscadores poderemos aproveitar tendo en conta que a produciòn de marisco vai claramente a menos. E para os mexilloeiros, cinco anos máis polo feito de estaren as súas fontes produtivas un pouco por fóra das rías. Pero a contaminación destas, máis cedo que tarde, tamén lles afecta. É así porque a desalinización das augas das rías provoca reaccións adversas en todos os bivalvos; e o mexillón, como o berberecho ou a ameixa son filtradores e se as rías non están en condicións, tampouco eles o están. Deberiamos preocuparnos, e moito, por este estado de cousas porque nos xogamos a sobrevivencia do marisco, do mar e a nosa como traballadores deste medio”.
Santiago Cruz, que asegura non ser político -“o meu voto é meu, e outórgollo a quen me parece que defende ou pode defender mellor o sector que represento”, afirmou en declaracións a O Barbanza- e por esto non entende o posicionamento contrario das federacións -nacional, galega e provinciais- de confrarías de pescadores pola convocatoria da manifestación en Santiago en demanda de solucións para as rías e contra os contínuos vertidos contaminantes a estes “viveiros de vida e traballo”: “Compre cambiar o rumbo nas políticas medioambientais. Todos no sector sabemos que as rías non soportan máis vertidos. É necesario un plan de saneamento anual das rías. As plataformas cidadáns, medioambientalistas, varias confrarías de pescadores e a maioría dos mariscadores galegos participamos na protesta porque apoiando a manifestación de Santiago estabamos reclamando saídas para o noso medio, que é o mar. Se causou malestar nas federacións teño que respostar que foi na defensa do noso, porque somos afectados. As federacións de confrarías nunca se mobilizaron cando reclamamos a eliminación de vertidos mineiros, de puríns, etc., aos ríos, malia seren sabedores de que a contaminación dos ríos é tamén contaminaciòn para as rías e destas para o mar aberto. Están exterminando o noso medio de vida e semella que non se decatan. E agora a Xunta rebaixa novamente o nivel de alerta porque din que o mar non trae á costa tantos pélets como traía. É que non saben que as correntes e o vento cambian e que estes cambios poden facer que os granulados que aboian no mar poden volver en calquera momento aos areais?. Deberían manter uns días máis o nivel 2, aguantar un pouco máis. O deles é tapar. Na ría de Muros-Noia, o mesmo que na de Arousa, hai vertidos de todo tipo, e aínda así estamos a tempo de salvalas: sanear as rías e mellorar os ecosistemas debe ser o obxectivo, ao meu criterio como mariscador”.
Os responsables do Plan Camgal (Plan territorial de continxencias por contaminación mariña accidental de Galicia) baixará nivel 1 o de alerta 2 que se mantén nas praias galegas polas mareas de granulados de plástico (pélets) desde o pasado 9 de xaneiro.
Dúas semanas dempois da decisión de subir á situación de risco 2, a Xunta considera oportuna a baixada progresiva da mesma durante esta semana debido a que, a aparición de pélets vai á baixa, o que non garante que no volva subir ese nivel se incrementara a situación de risco. Os medios de limpeza e vixilancia serán retirados paulatinamente.