O Concello de Dodro denunciou a aparición de pintadas no edificio consistorial, así como no centro de saúde da localidade, nas que se pode ler “5 partidos 11 incompetentes. Dodro respéctase” e “A sanidade é o primeiro” e “Dodro merece respecto”.
Segundo informou o Concello, a Garda Civil traballa para atopar aos culpables. Así mesmo, o Sergas tamén foi avisado do sucedido.
O alcalde, Xabier Castro, mostrou a súa repulsa ante este tipo de accións. Así mesmo, lembrou que ás concentracións que se celebran ante o centro de saúde para “reclamar solucións” acoden “unidos” todos os partidos políticos, polo que cre que este tipo de pintadas “non teñen sentido ningún”. Por mor destes feitos, o Concello avanzou que pedirá á Delegación do Goberno os permisos necesarios para colocar cámaras de seguridade.
