A rede de concellos galegos emprendedores vén de subir un novo chanzo estes días pasados, coa incorporación de Santiago, Cambre, Paderne, Taboadela e Lalín. A rede, como lembraremos, é unha iniciativa para facer voar a actividade económica e innovadora e achandar o camiño das emprendedoras e emprendedores nas súas aventuras empresariais, por exemplo facilitando os trámites administrativos, achegando incentivos fiscais e maiores facilitades para acceder ao solo industrial. Amais, reciben prioridade nas ordes de axuda autonómicas relacionadas co emprego, o emprendemento e a innovación.
Con respecto á nosa comarca, forman parte da rede os concellos de Rianxo, Ribeira (que hai dous anos iniciou o proceso de incorporación definitiva) e Boiro, por unha beira, e os de Noia e Porto do Son, pola outra.
En total, Galicia conta arestora con 131 Concellos Emprendedores.
Deste xeito, A Coruña conta con 33 concellos emprendedores, Lugo con 19, Ourense con 59 e Pontevedra con 20. Esta distinción (vencellada á Lei de implantación empresarial) supón apoiar a actividade industrial en Galicia con máis axilidade administrativa e bonificacións fiscais, apostando, deste xeito, polo crecemento económico da Comunidade galega e pola dinamización do tecido produtivo.
Métodos para adherirse, compromisos e vantaxes concretas
Para ser Concello Emprendedor, as administracións locais, unha vez aproban nos seus respectivos plenos a modificación das ordenanzas correspondentes, teñen que adherirse ao convenio asinado entre a Xunta e a Federación Galega de Municipios e Provincias (FEGAMP) para colaborar na captación de investimentos para Galicia, un acordo enmarcado dentro da Lei de implantación empresarial. Neste senso, o Goberno galego dá prioridade aos Concellos Emprendedores en diversas liñas de axudas destinadas a impulsar a fábrica intelixente (Industria 4.0), o emprego de calidade e o emprendemento baseado na innovación e no talento.
Os Concellos Emprendedores, pola súa banda, comprométense a ofrecer ás empresas que mostren interese por afincarse nas súas localidades máis incentivos fiscais, maiores facilidades para acceder ao solo empresarial e unha simplificación na tramitación administrativa. Os maiores incentivos fiscais por parte dos concellos para favorecer a chegada de novas empresas suporán unha bonificación de ata o 95% no IBI, IAE e ICIO para aqueles proxectos “que impliquen nova implantación ou ampliación de empresas xa existentes”.
