O concelleiro de Deportes de Ribeira, Xabier Vidal e o concelleiro de Mar, Fernando Abraldes, presentaron este martes 9 de xaneiro a V edición da Andaina e Milla Solidaria Heroínas de Sálvora que se celebrará o vindeiro domingo 14 no Porto de Aguiño ás 11 da mañá. Na presentación tamén estiveron Abraham Carreira e Julia Rey Dios, de Cáritas Aguiño.
Segundo explicaron, a inscrición, cun custe de 5 euros, poderase realizar ata o vindeiro xoves 12, e tódolos fondos irán destinados a Cáritas Ribeira.
O concelleiro Xabier Vidal destacou que “a organización destas andainas non só representa unha actividade recreativa, senón que tamén desempeña un papel crucial no fomento da saúde e a cohesión comunitaria.” Pola súa parte, Fernando Abraldes agradeceu á Confraría de Aguiño “que este ano nos deixa o local da lonxa para tomar un chocolate con churros despois da andaina”.
