A asociación inclusiva Ambar pechou o programa de actividades de 2023 coa campaña Abre Paso, unha iniciativa creada con motivo do Día Internacional das Persoas con Diversidade Funcional (o pasado 3 de decembro) cuxo obxectivo era reivindicar a accesibilidade nos espazos públicos de Ribeira e da comarca do Barbanza. Esta semana a asociación deu a coñecer no Facebook os nomes das persoas gañadoras do certame-campaña: olaiapr4 e fernandoaderitocl.
A iniciativa desenvolveuse nas redes sociais, onde se lanzou un convite a pendurar fotos ou vídeos que servisen de denuncia a todas esas zonas da nosa contorna que non contan coa debida accesibilidade. Cada material subido acompañouse co cancelo #abrepaso, etiquetando a asociacion.ambar e incluíndo a localización onde se atopa a zona rexistrada. Coa información que se recolla grazas a todas as persoas que colaboraron en Abre Paso realizarase un mapa no que se indiquen as zonas non accesíbeis e co que reclamar “que todas as persoas, con independencia das súas características, podan circular libremente polas súas vilas e os seus pobos”, sinalou Ambar na presentación da campaña.
