O Cemiterio de Boisaca (Santiago) acolleu este venres 5 de xaneiro a tradicional ofrenda floral a dous grandes ilustres representantes da nosa cultura: Ramón María del Valle-Inclán e Isaac Díaz Pardo. Participaron, entre outros persoeiros, o conselleiro de Cultura, Educación, FP e Universidades, Román Rodríguez, o director xeral de Cultura, Anxo M. Lorenzo, a alcaldesa de Santiago, Goreti Sanmartín, ou o director do Museo Valle-Inclán da Pobra, Antonio González Millán.
Coa ofrenda conmemorouse o 88 aniversario de Valle-Inclán e os 12 anos do pasamento de Díaz Pardo, soterrados ambos neste cemiterio compostelán. “Aquí tamén repousan dous dos últimos autores homenaxeados no día das Letras Galegas, Antón Fraguas e Ricardo Carvalho Calero”, sinalou Román Rodríguez.
O representante da Xunta de Galicia, xunto cunha ampla representación institucional, da cultura e familiares dos homenaxeados, puxo en valor a figura dos ilustres escritores pola súa extraordinaria relevancia no século XX e puntualizou que neste 2024 “se cumpren nada menos que 125 anos da primeira obra de teatro de Valle-Inclán, Cenizas, drama en tres actos”. Máis alá do seu talento e traballo, Román Rodríguez destacou a fonda pegada humana que deixaron Díaz Pardo e Valle-Inclán en Galicia.
