O BNG denuncia a emerxencia medioambiental provocada polo verquido de toneladas de micro plásticos de propileno (pellets) ó mar trala perda de varios contedores dun barco que navegaba polo corredor de Fisterra.
Desde a semana do 11 de decembro empezaron a aparecer sacos cheos de boliñas de plástico a praias de Ribeira, despois chegaron a Porto do Son, a Noia e desde fai uns días en Muros.
Algúns dos sacos rebentaron e chegan coas mareas inundando de branco a area. A situación é gravísima, a dificultade para a limpeza de partículas tan pequenas, que se mesturan coa area fai máis necesaria aínda toda a axuda posible das administracións, pero os concellos atópanse sos nunha situación que recorda os primeiros días da marea negra do Prestige.
A alcaldesa de Muros recibiu fai tres días a chamada da demarcación de costas, advertíndolle da necesidade de ir recoller os sacos que chegaran á praia de Area Maior, ela xa tiña constancia por parte de particulares e xa mandara persoal do concello a recollelos, preguntou cal era o protocolo, cando ían mandar efectivos, “ dixéronme que o protocolo era que limparamos con coidado de quitar todas as boliñas de plástico retirando a menor area posible.
Tivemos que mandar o Ges con vasoiras, porque cos enciños non se dá collido, e co tractor de limpeza de praias xa non das collido nada, está para lixo máis grande”. María Lago di “ que se senten abandonadas polas administracións”.
En Ribeira pasou o mesmo fai unhas semanas, ninguén foi axudar, Antía Alberte, concelleira de Medio ambiente “na Xunta dixéronnos que agardáramos, a ver si a empresa mandaba a alguén e se facía cargo, pero tíñamos claro que se non limpábamos antes de que rebentaran os sacos e se verteran ó mar ia ser peor, e mandamos operarios a recoller máis de 53 sacos”.
O desastre medioambiental aínda non pode predicirse, porque as boliñas de plásticos seguen descompoñéndose e sendo inxeridas por toda a cadea alimentaria.
Rosana Pérez, deputada do mar do BNG, recorda a situación dramática na que se atopa o sector nestes momentos “ o sector do mar, tanto en Muros Noia, como na Barbanza, leva desde outubro parado, con grandes perdas económicas, xa que perderon toda a campaña do nadal, e sen ningún apoio por parte da Xunta e agora este novo desastre incide outra vez no mesmo sector, se non se atalla o problema antes de que o plástico chegue á cadea alimentaria , a situación económica pode ser máis precaria aínda ”. Pérez informa das iniciativas parlamentarias que o BNG rexistrou hoxe mesmo no Parlamento do Estado para solicitar información do MITECO sobre as actuacións que ten previsto levar a cabo o goberno do estado, que é o que ten competencias en salvamento e loita contra a contaminación marítima.
Por outra banda, Pérez manifesta que “é incomprensible que a Xunta non teña exixido do Estado actuacións inmediatas, e que non teña posto a disposición dos concellos todos os medios necesarios para recoller os verquidos”, Pérez insiste en que “Rueda debe baixarse do autobús electoral e atender os problemas reais da nosa xente do mar”
