Este luns, soben as pensións e mantense o IVE rebaixado para algúns alimentos, mentres que paulatinamente sobe o que grava a enerxía, luz e gas.
A previsión é que as pensións vanse revalorizar un 3,8 % de media, aínda que as mínimas e non contributivas aumentarán case un 7 %, o mesmo que o ingreso mínimo vital (IMV). As pensións de viuvez subirá un 14 % este ano.
Mentres aínda se agarda a que conclúan as consultas para decidir a revalorización do salario mínimo interprofesional (SMI), que polo momento comeza o ano conxelado nos 1.080 euros nos que se situou en 2023.
En canto ao salario dos funcionarios tamén se mantén invariable neste inicio de 2024, á espera da aprobación dos presupostos do Estado para 2024 e que deben dar cumprimento ao acordo que recolle unha suba fixa do 2 %, máis un variable do 0,5 % en función da evolución dos prezos.
Polo menos durante a primeira metade do ano, vaise manter o IVE ao cero para os alimentos básicos como o pan, leite, fariña, ovos, queixo ou froita, e do 5 % para pastas e aceites.
Prorrogáronse as subvencións ao transporte público. Os servizos de proximidade e media distancia ferroviarios de titularidade estatal serán gratuítos para os viaxeiros frecuentes, e a metade de prezo os de media distancia a alta velocidade (Avant), e o mesmo ocorrerá coas liñas de autobús estatais.
Tamén se mantén a redución do 30 % en metro e autobuses urbanos sempre que as comunidades e concellos completen a redución para chegar ao 50 %.
Polo que respecta á enerxía, o prezo de venda ao público da bombona de butano manterase en 15,14 euros durante os primeiros compases deste 2024.
Aínda non está claro como quedará a factura eléctrica, cuxa nova formulación comeza este 1 de xaneiro. Non obstante, a nivel fiscal si se sabe que o IVE pasará do 5 % ao 10 % durante todo 2024, e que en 2025 se recupere o do 21 % que se aplicaba previamente a crise de prezos da enerxía.
No caso das subministracións de gas natural o IVE situarase no 10 % durante os tres primeiros meses; a tarifa individual de Último Recurso (TUR) do gas subirá, de media, un 8,19 % a partir deste 1 de xaneiro, cando o carburante dos transportistas profesionais deixarán de ter a bonificación da que gozaban ata o de agora, de 5 céntimos por litro de gasóleo.
Tamén actualizáronse as tarifas das peaxes das autoestradas de titularidade estatal baixo concesión administrativa, que a partir deste 1 de xaneiro soben entre un 5 e un 6,65 %, e as de Correos elevan 4 céntimos, ata 0,82 euros, o prezo da carta máis empregada, ata 30 gramos.
A AP-53, esencial na comunicación entre Santiago e Ourense, é unha autoestrada de pago entre a capital galega e o Alto de Santo Domingo. A suba que experimenta este traxecto en 2024 sitúase na media que fixou o Ministerio de Transportes e Mobilidade Sostible para a maioría das autoestradas do Estado. Aplican desde hoxe unha suba dun 5,07 %.
Para o treito entre Santiago e o Alto de Santo Domingo encarécese 30 céntimos de euro. Pasa a custar 6,70 para turismos, ese treito completo de 56 quilómetros. Os pesados pagarán 11,35 ou 13,50, segundo sexan de categoría 1 ou 2. Eses son os prezos para o treito completo (entre Santiago e o Alto de Santo Domingo) de 56 quilómetros.
Os usuarios da Autoestrada entre Santiago e Dozón están aínda pendentes de que se apliquen as bonificacións previstas no pacto de investidura entre PSOE e BNG, que se aplicarán por primeira vez nesta vía, e que segundo o Ministerio de Transportes suporían un aforro de ata o 75 por cento para os usuarios habituais.
