A Asociación de Persoas con Discapacidade da Bisbarra de Muros (ADISBISMUR) está a levar a cabo obras de mellora nas instalacións do centro ocupacional que ten situado en Valadares, no concello de Outes. Os traballos a desenvolver poñen o foco nas fachadas do inmóbel, con vistas a protexer a temperatura interior e de evitar as filtracións de humidades polas paredes exteriores, co seu conseguinte aforro de enerxía.
Segundo informou a confederación galega COGAMI, as obras de remodelación son posíbeis a través do co-financiamento da Consellería de Política Social e Xuventude da Xunta de Galicia que xestiona os fondos do 0,7% do IRPF de todas as persoas contribuíntes que marcaron o recadro de Actividades de interese xeral cando fixeron a declaración da renda.
COGAMI tamén salienta que as melloras na fachada do centro beneficiarán ás 52 persoas usuarias que acoden de luns a venres a estas instalacións para recibir unha formación académica, laboral e de desenvolvemento persoal co fin de lograr unha mellor autonomía persoal.
