A Carpa Solidaria que o Concello de Boiro volveu habilitar este Nadal na praza de Galicia será esta semana un fervedoiro de actividades culturais para a rapazada. Sen ir máis lonxe, este martes 26 de decembro a carpa acollerá o espectáculo A xogar cos trasnos de Nadal. Será ás 18.30 horas e virá da man de Barafundas. Trátase dun espectáculo para público infantil e familiar.
Ao día seguinte será a quenda da agrupación Animar-T, que ofrecerá á rapazada (nenos pero tamén maiores) a función A bailar no Nadal. Será na Carpa Solidaria ás 18.30 horas deste mércores 27 de decembro.
As actividades proseguen o venres 29 de decembro ás 18.30 horas, da man de Trémola Teatro, que ofrecerá a cita cultural Elfos en prácticas, un espectáculo para público infantil e familiar.
