Axentes da Policía Nacional adscritos á comisaría de Ribeira procederon á detención dun varón de 32 anos de idade, residente en Vigo, como presunto autor do roubo con forza no interior de 22 vehículos e da subtracción doutro turismo, estacionados todos na zona de As Abesadas, en Ribeira.
Desde a comisaría tívose coñecemento de que, en datas recentes e mediante a interposición de varias denuncias, persoas descoñecidas accederan ao interior de varios vehículos tras fracturar unha das fiestras, efectuando a subtracción de diversos efectos de valor.
Unha vez establecido o dispositivo policial ao efecto e froito do mesmo, procedeuse á detención dun varón, quen foi sorprendido in fraganti no interior dun turismo, ao cal accedera empregando o método referido anteriormente. Entre os efectos que portaba, interviñéronselle ferramentas, unha lanterna e a chave dun vehículo subtraído o día anterior nesta localidade.
Os axentes realizaron as xestións e pescudas, logrando localizar o vehículo roubado, atopándose no interior do mesmo os restantes efectos subtraídos, os cales foron entregados aos seus lexítimos propietarios.
Ao detido impútanselle un total de 22 delitos de roubo con forza no interior de vehículo e un roubo con forza de vehículo. Ademais, constábanlle diversos antecedentes policiais por feitos similares. Despois de ser posto a disposición da autoridade xudicial, decretouse o seu ingreso en prisión provisional.
