O deputado do BNG, Luís Bará instou ao Goberno central a poñer en marcha un plan de accións contra o “espallamento descontrolado” da herba da pampa, unha especie invasora que cada vez ocupa máis terreo ao longo da xeografía galega, e de maneira especial nos concellos do Golfo Ártabro e das rías de Arousa, Pontevedra e Vigo, nos que se produciu una “invasión xeneralizada”, en palabras do BNG, que indica que esta proliferación materializouse en paralelo á construción de grandes infraestruturas viarias e ferroviarias, así como en polígonos industrias. No caso do Barbanza, a herba da pampa vai estreitamente ligada ao trazado da autovía, cuxas marxes están inzadas pola especie.
A proposición non de lei defendida polo deputado do BNG inclúe: presentar un informe das actuacións realizadas nos últimos 5 anos para controlar, mitigar a expansión e eliminar a especie invasora incluíndo os resultados en Galiza do Proxecto Life+Stop Cortadeira e aprobar “en dous meses” o plan de accións para o control, xestión e posíbel erradicación da herba da pampa, cunha duración de cinco anos prorrogábeis e achegas da Xunta, administración estatal e deputación así como das empresas construtoras e xestoras das autoestradas e autovías que transcorren polo territorio galego”.
Na defensa da proposta, o nacionalista explicou que “as especies exóticas invasoras constitúen unhas das principais ameazas para a biodiversidade e supoñen ademais riscos para os equilibrios ecolóxicos, a saúde e as actividades económicas”. E engadiu: “A herba da pampa (cortaderia selloana) e unha das máis agresivas en Galiza” e prolonga o período de alerxias primaverais que se estenden até o mes de novembro nas zonas de maior presenza da especie”.
Na súa intervención, o deputado tamén relatou as actuacións anunciadas pola Xunta do PP para combater as especies exóticas invasoras, como o plan estratéxico aprobado en 2013 e do que “transcorridos dez anos non se coñecen os resultados das diferentes liñas de actuación” e indicou que a Lei de Patrimonio Natural e da Biodiversidade establece, entre outras recomendacións , que a consellería competente estableza unha rede de alerta para a vixilancia destas especies invasoras e adaptar medidas para o seu control ou erradicación.
Asemade, no 2020, engadiu, “a Consellería de Medio Ambiente volveu anunciar a elaboración dun plan de acción específico para loitar contra a propagación da herba da pampa, e a principios deste mesmo ano volveu anunciar por enésima vez un plan de acción para a súa erradicación, xunto cun convenio coa Universidade da Coruña (UdC) para aplicar unha nova tecnoloxía capaz de empregar como sistema de control biolóxico un parasito desta planta, segundo informaba o propio Goberno galego”.
Porén, dixo, “malia todo este despregue propagandístico” criticou o nacionalista, “a realidade é que a herba da pampa ten un espallamento absolutamente descontrolado por unha boa parte da xeografía galega, como se pode observar nunha viaxe a través da AP-9 e doutras autoestradas e autovías”.
