O concello de Porto do Son é estes días un fervedoiro de celebracións de Samaín. Entre as moitas festas previstas non podemos deixar de destacar a que preparan a Asociación de Nais e Pais (ANPA) As Furnas e a Asociación de Veciños Sartaxas de Xuño. As actividades (terroríficas e divertidas á par que creativas) desenvolveranse este martes 31 de outubro e, tamén, este mércores festivo, 1 de novembro, logo das celebracións desenvolvidas o sábado 28 (obradoiros de cociña e de cupcakes en inglés). A festa de Samaín deste martes comezará ás 19.00 horas con xogos e merenda para a rapazada participante. Na seguinte xornada, a deste mércores, poderemos ver (en horario de mañá e de tarde) a exposición de cabazas preparada polo alumnado do CEIP de Xuño. Será na Casa da Cultura, dende as 10.00 ás 13.00 e dende as 16.00 ás 19.30 horas.
