O alcalde da Pobra do Caramiñal, José Carlos Vidal, e a concelleira da Mobilidade, Rosana Pérez, mantiveron este 27 de outubro unha reunión de traballo co director da Fundación RIA, Manuel Rodríguez, para avaliar a proposta de ampliar o proxecto de humanización da AC-305 ao seu paso pola localidade. De feito, a intención da Fundación RIA é dar continuidade a este proxecto que se iniciaría no concello de Ribeira para facelo extensivo á Pobra do Caramiñal na senda dunha planificación territorial estratéxica.
No contexto específico da Pobra analizouse como afectaría esta actuación á circulación do tráfico rodado, pero tamén á mobilidade peonil trala ampliación das beirarrúas, ademais de como afectaría ás edificacións e ás infraestruturas situadas a carón da referida estrada de titularidade autonómica, como, por exemplo, a propia Casa Consistorial.
Tanto o rexedor coma a edil indicaron que “a análise da Fundación RIA coincide en gran medida coa efectuada polo Goberno local no que se refire a necesidades por solucionar no curto ou no medio prazo no núcleo urbano”.
Deste xeito, acordaron sinalar na axenda futuras xuntanzas para seguiren a afondar nesta cuestión e presentárenlla á totalidade da Corporación municipal, para “contar cun proxecto realista acorde coas características urbanísticas da Pobra e buscar formas de financiamento”.
