Debido á choiva prevista para esta fin de semana en Rianxo, a Plataforma pola Defensa do Monte e o Laboratorio Ecosocial do Barbanza decidiron atrasar a celebración das Xornadas por un Monte Vivo ata próximo aviso.
Conservarase a dirección de correo electrónico das persoas inscritas para enviarlles unha mensaxe cando se estableza unha nova data para o evento.
As novidades sobre a celebración das Xornadas publicaranse na páxina web do Laboratorio Ecosocial do Barbanza (barbanzaecosocial.org) e da Fundación RIA (fundacionria.org), así como nas canles en redes sociais da Plataforma pola Defensa do Monte e nas das entidades colaboradoras no evento.
Para máis información, poden escribir a info@barbanzaecosocial.org.
Como dixemos, as xornadas veñen da man da Plataforma pola Defensa do Monte de Rianxo e o Laboratorio Ecosocial do Barbanza, que buscan dar continuidade á colaboración entre ambas entidades desde 2021 impulsando unha fin de semana ateigada de actividades abertas á participación da cidadanía.
A orixe destes encontros está nos incendios que asolaron o territorio de Rianxo e que motivaron a constitución da Plataforma en Defensa do Monte –formada por oito comunidades de montes de Rianxo e pola asociación Fousas ao Monte–, co obxectivo de “promover un cambio de modelo”, que na actualidade está caracterizado polos monocultivos forestais, as dificultades para levar a cabo unha xestión activa do monte e os incendios recorrentes, sinalan.
