O Goberno local de Ribeira mantivo este mércores 25 de outubro unha reunión coa veciñanza de Olveira para abordar as necesidades da parroquia. A xuntanza, celebrada en aberto, tivo o obxectivo de “escoitar activamente as propostas e necesidades de mellora”, segundo afirmou o rexedor Luís Pérez Barral, e nela tratáronse temas relacionados co mantemento, a limpeza, o alumeado e o saneamento. A veciñanza expuxo así mesmo necesidades relativas á ampliación de mobiliario urbano e á dinamización cultural da parroquia.
O equipo de Goberno, pola súa parte, comprometeuse a atender canto antes ditas necesidades, aínda que algunhas cuestións, recoñeceron, “requirirán tempo para poder executarse”. Os membros do Concello tamén debullaron o estado no que se atopa o saneamento do núcleo de Campelos, cuxas obras xa comezaron, así como tamén se comprometeron a solicitar á Xunta a reforma integral do Colexio de Olveira.
Luís Pérez e o concelleiro Suárez Puerta afirmaron que se “van a presentar emendas aos orzamentos da Xunta para solicitar que se inclúa a reforma do edificio que permita mellorar a envolvente térmica, a accesibilidade e a seguridade”.
Durante a reunión tamén se abordou a necesidade de dinamizar e revitalizar a parroquia no ámbito cultural e ambiental, xa que é preciso “poñer en valor o Parque Natural” segundo afirmou a concelleira de Medio Ambiente Antía Alberte, tamén presente no encontro.
O equipo de Goberno comprometeuse a traballar para mellorar a limpeza e o saneamento, ampliar mobiliario urbano -papeleiras, bancos- e trasladar aos organismos competentes as cuestións relacionadas co Parque Natural e a reforma do colexio.
Na xuntanza estiveron presentes o alcalde de Ribeira, Luís Pérez, os tenentes de alcalde, Vicente Mariño, Francisco Suárez-Puerta, Xabier Vidal e os edís, Antía Alberte e Fernando Abraldes.
