Este martes 10 de outubro a psicóloga de AGADEA Alzhéimer Alba Iglesias e a traballadora social Laura Somoza impartirán en Rianxo a charla Recursos e terapias non farmacolóxicas, dirixida a mellorar a saúde e a calidade de vida das persoas maiores a través de metodoloxías opostas á sobremedicación.
Podemos inscribirnos na actividade enviando un correo co noso nome e os nosos apelidos a cdiaribeira@xunta.gal ou nos Servizos Sociais do Concello de Rianxo. Desenvolverase no Centro Social Liceo de Rianxo, a partir das 17.00 horas (até as 19.00).
A actividade forma parte do intenso programa de iniciativas que prepararon o Concello e AGADEA para esta tempada. Este programa inclúe a posta en funcionamento dun centro terapéutico para persoas con alzhéimer e procesos de deterioro cognitiva (anunciada o mes pasado polo Goberno de Julián Bustelo, con inicio fixado para outubro) e actividades concretas para mellorar a atención e a saúde dos maiores do concello, a través do ciclo Activa a túa Mente.
