Prosegue a axenda cultural de Boiro con mancheas de propostas. Amais da mostra Madeiras do mar, de Ruth Beltrán, que se poderá visitar no segundo andar do Centro Social durante o mes de outubro, e da exposición Vida e obra de Francisco Fernández del Riego ( mostra realizada polo alumnado de plástica do IES A Cachada que se pode contemplar na Casa da Cultura), este xoves 12 o pazo de Goiáns acolle ás 19.00 horas o espectáculo Demente, da compañía de danza de Fran Sieira no marco do Mes da Danza do Concello de Boiro. A entrada será un donativo de 2 euros para AGADEA Alzhéimer. En caso de choiva, será na Casa da Cultura.
Demente é unha obra de baile e música tradicional galega para público adulto de 60 minutos de duración. O seu elenco está composto por oito bailadoras e bailadores, acompañados da música do compositor e músico multidisciplinar Cristian Silva Bóveda. Todo isto desenvólvese dentro dun marco escénico e cun vestiario deseñado por Carlos Alonso Alonso, xunto co deseño de iluminación de Fidel Vázquez Díaz. A parte máis física e a estética contemporánea preséntase a través dos ollos da bailarina e coreógrafa catalá Carla Diego Luque como directora artística.
En Demente a compañía de danza Fran Sieira plasma unha realidade, un estigma, unhas patoloxías que segundo a Organización Mundial da Saúde sufriron, sofren ou sufrirán nalgún momento da súa vida unha de cada catro persoas.
Por outra banda, a contadora Vero Rilo estará na Biblioteca de Boiro o día 13 ás 20.00 horas para achegar o espectáculo para público familiar E a ti… que che contaban?
A maiores, o sábado 14 celebrarase na Biblioteca de Boiro o obradoiro A biblioteca ideal. Crea un libro con nós de Os Náufragos Teatro para público infantil e familiar a partir dos 4 anos (prazas limitadas, inscricións no 981 84 84 10).
O sábado 14 proxéctase no Centro Social de Boiro o filme María Casares, ás 20.00 horas, no marco do Ciclo de Cine Mestre Mateo.
