Este luns 16 de outubro as 18:30 o salón de actos do Instituto Félix Muriel de Rianxo vai acoller unha charla obradoiro sobre TDAH, destinada poñer o foco na importancia da formación e de contar con recursos “para que o alumnado que ten TDAH se sinta incluído e motivado nos seus estudos como o resto do alumnado”. A charla será impartida pola Asociación TDAH Salnés e vén da man da ANPA Virxe de Guadalupe.
TDAH, para quen non o saiba, son as siglas de Trastorno de Déficit de Atención e Hiperactividade.
A maiores, esta mesma semana a ANPA Virxe de Guadalupe organiza este martes 17 ás 17.30 horas no auditorio do IES rianxeiro outra charla na que se vai poñer o foco no uso racional, anti-machista e seguro das novas tecnoloxías, concretamente no emprego das redes sociais. Trátase dunha actividade subvencionada pola Secretaría Xeral de Igualdade da Xunta de Galicia e financiada polo pacto do Estado Contra a Violencia de Xénero, abeirada ao Programa Lúdico de Videoxogos e Redes Sociais e Igualdade (un proxecto innovador que traballa a erradicación dos estereotipos e da violencia de xénero a través do cine, do baile, o teatro, os videoxogos, as redes sociais).
